ارسم حياتك (( التخطيط 3 ))

غبت عنكم ... سامحونى ... بس لو عرفتم أسبابي هتعذرونى

و انا يكفينى المسامحة

هفكركم سريعا كده ... في ارسم حياتك ((التخطيط 1))

عرفنا السبع جوانب الواجب توافرها في خطة الحياة

و عملنا جدول نفسي كما يجب أن تكون

و في ارسم حياتك ((التخطيط 2))

عملنا جدول لنفسي في الواقع الحالي

و عملنا ورقة المميزات و ورقة للنقاط الاقل قوة

و كنت سيباكم بالاستعانة بالاربع ورقات

تجاوبوا علي السؤالين التاليين

 هل في مميزات تنقصك عشان تقدر توصل بيها للي تتمناه و يحقق رضاك ؟؟

طيب هل في نقاط أقل قوة ... محتاج تقويها ؟؟؟؟؟

قعدنا و فكرنا إزاى من خلال زيادة المميزات و تقويم النقاط الأقل قوة ... أوصل لطريق امشي فيه عشان انتقل من الواقع للوضعاللي اتمناه .

النهارده ... يعتبر أهم يوم من أيام التخطيط .... النهارده يوم الانطلاق ... 

من خلال التوصيات اللي وصلنا ليها من خلال تفكيرنا و تحليلنا لل 4 ورقات ... هنعمل دلوقتى حالا بإذن الله قائمة بالمهام ..

يعنى نجيب ورقة جديدة و نكتب الحاجات اللي احنا شايفين انها المفروض تتحط ف اعتبارنا عشان تكون قيد التنفيذ ... هنكتبها بدون أى ترتيب ... زى ما هتيجى في بالنا ....

بس أوعى تنسي أى حاجه أساسية عايز تعملها .

خد وقتك أوووووووى أووووووى في كتابة الورقة دى

و لو حابب ... ارجع لل 4 ورقات .... هيساعدوك انك تفتكر كل حاجه ...

كده أصبح معانا ورقه جديدة ... هى ورقة المهاملكنها في صيغتها الحالية لا ترقي لتكون هدف 

إزااااااى ... أمال أيه المهام ... المهام ما هى إلا أهداف... صح ؟؟؟؟

لأ ... مش صح

الصح ... المهام قد تكون هدف ... و قد تكون هدف مصاغ بطريقة غلط ... أو غير مكتمل الأركان

لا لا لأ .... Wait kda

ممكن تتوضحى أكتر

يعنى أيه هدف؟؟؟ و يعنى أيه أركان الهدف ؟؟؟؟ و هل للهدف صياغة معينة ؟؟؟؟

حاضر

بس كده

أقولك يا سيدي

الهدف هو

شيء ملموس يمكن تحقيقه خلال فترة زمنية محددة ... و هو نتيجة يسعي الفرد لتحقيقها بطريقة مشروعه ..

أركان الهدف .... هنلاقيها واضحة جدا في تعريفه ... و هى كالتالي

1- ملموس... محدد بدقة

2- محدد بفترة زمنية

3- يمكن تحقيقه فعليا

و الهدف لابد من صياغته بصورة تغطى أركانه الأساسية الثلاثة

فمثلا

لو أنا قلت ان هدفي التخرج من كلية الهندسة

((دى صياغة خاطئة))

لانه يمكن تحقيقه ... و ملموس .... لكن محددتش اتخرج سنة كام (( لم اذكر الفترة الزمنية ))

مثال اخر

شخص ما ذكر ... ان هدفه يصبح غنى سنة 2015

دى بردوا صياغة خاطئة

لانه محددش الهدف بوضوح ... غنى ... دى حاجه مش ملموسه أوى ... مذكرش مقدار الغنى ده

و هكذا

دلوقتى بقي .... ممكن نجيب ورقة جديدة ... و نحول المهام لأهداف ؟؟؟

و إن شاء الله في ارسم حياتك ((التخطيط 4 )).... هنعرف هنكمل مع بعض خطة العمر

انتظرونى ...