ارسم حياتك ((التخطيط 2 ))

فاكرين أول سؤال سألته في تدوينة ارسم حياتك (( التخطيط 1 )) من 4 أيام ؟؟

سواء كنت فاكره .... أو لسه بتشوف المقال للمرة الأولي و عرفته

هتكتشف اكتشاف عجيب

أنا سألت و مجاوبتش

عشان الاجابة زى ما هى عندي هي عندك

و لأن كلنا عارفين أهمية التخطيط

و ببساطة لو انت مكنتش تعرف أن التخطيط

• بيحدد أهداف ثابتة و واضحة 

• بيساهم بشكل كبير في تحقيق 90% من الأهداف 

• بيحسس اللي بيخطط و ينفذ بأنه إنسان رائع و مميز 

كان زمانك موصلتش للسطر ده و كنت قفلت التدوينة دى و مكملتش قراءة

و بما أنك وصلت للكلمة دى .... أحب اهنيك أيها الرائع ... 

و أهنيء نفسي لأنك سمحت لي اشاركك و لو بجزء بسيط في رسم حياتك 

و دلوقتى متوقع من كل واحد فينا يكون معاه ورقة زى دى

مكتوب في كل جانب نفسه كما يتمنى أن يكون ... في كل جانب من الجوانب الحياتية .

طيب ممكن ورقة جديدة بقي زيها بالظبط .... لكن المرة دى هنكتب فيها الواقع .... هنحدد  أحنا فين دلوقتى و بنقدر نحقق أيه في كل جانب بحياتنا الحالية قبل التخطيط .

دلوقتى معاك ورقتين .... واحده فيها اللي تتمناه .... وواحده فيها الواقع اللي عايزه

قارن الورقتين مع بعض .... و فكر شويه كده ... عشان توصل لأهم معادلة في حياتك ....

أيووووووون .... أهم معادلة في حياتك

معادلة الرضا ....

لأنك الشخص الوحيد اللي يعرف سر سعادتك

ها ؟!!!!!!!

خلاص ...  عرفت انت عايز توصل لأيه بالظبط ؟!!!

طيب .. اكتبه قبل ما تنساه

ويلا بقي نبدأ نخطط

و أحنا بنخطط هنتعامل مع 3 أنواع من الخطط

1 - خطط طويلة المدى ... أكثر من 5 سنوات .

2- خطط متوسطة المدى ... من سنة ل 5 سنوات .

3- خطط قصيرة المدى .... من يوم ل سنه .

يوووووووووه نستونى ... ناقص حاجه

عشان نخطط لحياتنا ... لازم نعرف نفسنا أكتر

و نحدد مميزاتنا

و الجوانب الأقل تميز

عشان كده هنجيب كمان ورقتين

واحده هنكتب فيها مميزاتنا و نقسمها 2 ... نص مميزات فطرية ... و النص التانى مميزات مكتسبة

و الورقة التانية (( عذرا)) النقاط الأقل قوة في شخصيتنا  .

استعين بال 4 ورقات (( اللي تتمناه - الواقع - المميزات - النقط الأقل قوة)) ...

و اقعد بقي فكر من دلوقتى و معاك 4 أيام  ....

هل في مميزات تنقصك عشان تقدر توصل بيها للي تتمناه و يحقق رضاك ؟؟

طيب هل في نقاط أقل قوة ... محتاج تقويها ؟؟؟؟؟

فكر مع نفسك و خد وقتك خااااااااااالص و معاك 4 أيام تفكير  .... و بعدهم نكمل مع بعض

خطة العمر  :)

و لو في أى سؤال خطر في بالك

اكتبه في التعليقات و انا هجاوب أول ما اشوفه علي طووووول

هستناكم أكتر ما هتستنونى
في ارسم حياتك ((التخطيط 3)) ه